kerkkameeldrift@gmail.com | +27 12 819 1424

So Maak Ons 2018

JAARTEMA 2018

Vind Vreugde

Leef Jou Feeslewe met Vreugde

VERSOEK...

Sustersbydrae

Suster, onthou asseblief jou maandelikse/kwartaalikse sustersbydrae waarmee ons die hele wa aan die loop moet hou. Daarmee sorg ons vir alles in die kombuis, ook Sondae se koffie en tee, skoonmaakmiddels, al ons byeenkomste se kostes, begrafnisse en kerkraadsvergaderings se eetgoed ens ens ens ens . Die werkers wat so fluks help dat ons nie nodig het om skottelgoed te was na funksies nie, se oortydlone en die susters se werker se volle salaris word daaruit betaal. Enige bydrae is welkom, so klein soos R30 ook! Doen dit per internet met verwysing: Sustersbydrae of plaas dit in Sustersbydrae koevertjie en gooi in kollekte-sakkies. Ons maak staat op almal se hulp in die verband

WIE IS DIE KAMEELDRIFT SUSTERS?

Dis die Kameeldrift Sussies wat die hande en voete van Christus in ons uitgestrekte gemeenskap is. Onder die vernuftige en vlytige hande van Susan Fourie, is ons uitreike na buite in die gemeenskap uiteenlopend en instrumenteel in die bewys van liefde. Ons bediening dra baie vrug, want dit word met passie, liefde en entoesiasme aangepak.  Ons werk nie vir   die Here nie, maar God werk deur ons.  Ons is ‘n saamstaan, saamwerk en saambid span wat mekaar se laste help dra.  Sodoende word die koninkryk uitgebou deur God se ligdraers te wees.

“Finnes” is ons nou al veel besproke spysenierings organisasie wat die geurgste disse optower en die mees feestelike tafels versier in die ganse Pretoria! Menige troues, dope, belydenisafleggings, verjaarsdae, matriekafskeide en feestelike herdenkings dra ons stempel.

 

Augustus is ‘n hoogtepunt op ons kalender: DAMESOGGEND! Dan word ongeveer 800 dames bederf met ‘n wonderlike inspirerende bederfdag. Tafelhoofde tooi tafels feestelik op.  Kreun-kreun onder ‘n wa-vrag eetgoed word tee, koffie en sap bedien. ‘n Inspirerende spreker spreek ons toe en ‘n gaskunstenaar kielie die voetsole om te skoffel.  Alle fondse wat daardie oggend ge-in word, gaan na ons Gereformeerde kinderhuise (President Kruger Kinderhuis en Reddersburg).  Op so ‘n oggend kan meer as R100 000.00 oorhandig word.

Ons sustersvergaderings is lankal nie meer ‘n stywe eentonige gedoente nie! Nee, as ons vergader, kuier ons gesellig saam. ‘n Tema vir die jaar word gekies en by 6 vergaderings word feestelik saam gekuier.  ‘n Spreker en gaskunstenaar tree op en natuurlik word daar om geurige geregte heerlik gekuier.  Lief en leed word gedeel en beplanning word gedoen vir die baie projekte waaraan ons deelneem.

 

As ek so dink aan alles wat ons gemeente aanpak, word ek tot oorlopens toe vol blydskap en dankbaarheid. Ten spyte van mense wat op afgeleë plekke binne ons gemeentegrense bly, ten spyte van die gevaarlike en soms dodelike Moloto pad, ten spyte van die afstande wat ons moet aflê om by ons kerk uit te kom, word ons bedrywighede baie goed ondersteun. Die gemeenskap van gelowiges word versterk deurdat ons ‘n hartlike omgee-span is wat gelowig biddend saamwerk. As God ons oorvloedig met Sy genade seën, sal ons altyd oorgenoeg hê om aan ander uit te deel. Dis waarvoor ons op aarde geplaas is: Ons moet mekaar se voete was.

Ek dank God vir die Kameeldrift Sussies. Hulle is my geloofsfamilie met God as ons Vader, Christus as ons Broer en die Gees wat in ons werk om mekaar aan te moedig en te versterk. Aan God Drie-enig sy alle lof eer en dank. (Plant)

31/08/2017

Ons as susters streef daarna om:

Ons geloof te laat groei en mekaar in die Woord op te bou en te versterk

  • God se Koninkryk uit te bou en ligdraers te wees
  • Ons deur God se liefde as eenheid in die gemeente SAAM te Bid
  • Hulp te betoon aan mense en instansies buite die gemeente wat dit nodig het
  • Mekaar se laste te dra
  • Fondse te in, deur liefdevolle harde werk, om middele te voorsien wat nodig is om die doelstellings te bereik
  • Eie aan die aard van die vrou, TUISTESKEPPER te wees, wat die gemeentelike saamleef aangenaam, huislik en warm maak. So kry die skink van ‘n koppie tee dimensie wanneer dit teen die agtergrond gesien word.

SUSTERS OPENINGSFUNKSIE 2018

Die tafels is feestelik versier met die tema :”Dit maak my bly!” by Keurboom. Die funksie word bygewoon deur 87 susters en ‘n paar broeders. Dit opsigself maak ons bly! Ja, Kameeldrift Sussies skop 2018 op ‘n hoë noot af met die positiewe uitleef van ons dankbaarheid teenoor ons ewige, almagtige God wat regeer tot in ewigheid.

Reynold Fourie is ons begeesterde spreker. Op sy unieke manier gebruik hy die metafoor van die vreugdevloed wat in ons vloei maar ook na buite moet vloei. Almal van ons wil gelukkig wees. Ons soek dit op verskillende plekke en verskillende maniere: VREUGDE INVLOED

Party mense vind vreugde in ‘n bottel wat bruisdrank bevat, ander in geld, verhoudings en ander invloede van buite, maar as dit opraak, vervaag die gevoel van geluk. Hierdie vreugde is nie konstant nie.

VREUGDE UITVLOED

Christus het aan ons die uitnodiging gerig: Kom na My toe almal wat vermoeid en belas is, en Ek sal julle rus gee. Drink van My water, dan sal daar strome lewende water uit jou uitvloei. Christus is die BRON van vreugde. Deur die Heilige Gees kan die vreugde nou uit my ook vloei.

Vreugde is die stroom wat deur my na buite vloei en ander kan aanraak. Hierdie vorm van vreugde word nie deur dinge van buite beinvloed nie, want as ek ingebed is by die BRON van vreugde, is ek veilig. Om vreugde te vind, is ‘n aksie. God is vreugdevol, omdat Hy liefde is.

*God het ons eerste lief gehad. Hy het Sy Seun gestuur om my sondeskuld weg te neem.

*Ons is na Sy beeld geskape, daarom kan ek vreugdevol wees.

*Christus leef in volmaakte harmonie met God die Vader. Dit is volmaakte liefde.

*Die Heilige Gees kom uit die Vader en die Seun

*Ons moet deel word van die Drie-enige God .

*Na die sondeval, stuur God die Seun om vir ons sondes aan die kruis te sterf.

*God verlaat Sy Seun aan die kruis, sodat ons nooit meer verlaat sal word nie.

*Ons verheug ons oor die verlossing.

*God verander stres in vreugde, sodat ons vreugdevloed kan oorloop.

Daar is vreugde blokkeerders wat die vloei van vreugde breek:

*Sonde *Selfsug – buite invloede*Ons glo maklik die binne- en buite-invloede*Verkeerde vriende wat ons maklik ompraat

Hoe vind ek vreugde in goeie en slegte tye?

*Stel jou vertroue op God. Wees ‘n boom wat by waterstroom geplant is en goeie vrugte dra

*Hoop op Christus: Beproewings maak nie vreugde dood nie, dit leer volharding.

*Hou die oog op Christus: Heb 12:2

*Hierdie lewe is nie die enigste lewe nie, daar kom ‘n EWIGE LEWE! *Bind jou gedagtes aan Christus vas.

*Herinner jouself hoe God oor jou voel: Hy het jou eerste lief gehad.

God is vol vreugde oor ons. Leef dan saam met God en onthou: SEFANJA 3:17

“Die Here jou God is by jou, Hy, die krygsman wat red. Hy is vol vreugde oor jou. Hy is stil-tevrede in sy liefde. Hy jubel en juig oor jou…” Ryan Walt en Steven Sterling het ons vermaak met panfluit en sang.

Ons is getrakteer op heerlike gevulde pannekoek en ‘n koppie vol poeding. Weereens ‘n wonderlike, gesellige aand vol pitkos en stuitighede op eg Kameeldrift manier.

Plant

Close Menu
Clef two-factor authentication